القائمه الاقريقيه و الانتخابات قنابل في قطبي الكره المصريه

تقرير/ رنا عماد

الأسبوع ده الأهلي هيطلّع بيان... لأ لأ... مش بيان في مسرحية 'حسني عبد ربووه'... لأن عند البيان ده والدنيا بتقفل كل أيام الأسبوع ده واللي جاي... وبتحصل حالة خرس كروي... والكلام بيتوه من الناس... وبيحصل تطنيش ولكن البيان اللي بنتكلم عليه هو إعلان أسماء الأماكن الأربعة في القائمة الأفريقية اللي الأهلي هيكمل بيهم قائمته...وصدق من قال إن الموضوع ده قنبلة ذرية هيدروجينة في الأهلي... وده ليه عشان يا جماعة الأهلي جاب 6 لاعيبة جداد وكمان 2 إعارة ويمكن يجيب الأسبوع ده اتنين كمان يعني يبقى عشر لاعيبة القصة إن مفيش غير 4 أماكن بس والحكاية دي عاملة صداع في دماغ الخواجة لدرجة إن فيه ناس بتقول إن ده عامل أزمة والخواجة قال إيه خايف من غضب اللاعيبة اللي مش هياخدهم معاه... وطبعًا الكلام ده فشنك؛ لأن الخواجة ما بيخافش من حد... مش من لاعيبة لا ولا حتى لجنة الكرة نفسها ولكن بيني وبينكم لما اتكلمت مع أكثر من لاعب من الجداد حسيت إن القائمة الأفريقية هي اللي في دماغهم وكلهم خايفين إنهم يكونوا بره الليلة... طب تعالوا نشوف مين اللي هتشملهم رعاية 'جوزيه'... أولهم 'رمزي صالح' الحارس الجديد عشان مفيش غير اتنين بس هما 'أمير' و'أحمد عادل عبد المنعم'... وتاني واحد 'أحمد حسن' اللي ما وقفش إلا لما وافقوا في الأهلي على حط اسمه في القائمة الأفريقية وتاني واحد 'وائل جمعة' بعد ما اتأكدوا إن 'حسني' بره الليلة وعشان ينعدل شوية حال الدفاع وبكده يبقى فاضل مكان واحد بس وعليه 7 لاعيبة هما مين؟ شوفوا: 'سيد معوض'، و'حسين ياسر المحمدي' والاتنين أجمد من بعض، وكمان 'حسن مصطفى' و'أحمد علي' ومش كده وبس: و'أحمد حسن'، 'دروجبا' و'هاني العجيزي' و'عبد الحميد أحمد'... والقصة في التلاتة الأولانيين؛ لأن الباقي مالهمش ضهر ومن المتوقع إن 'حسن مصطفى' يعمل كوارث ويقول: إن الزمالك بيفاوضه وبكده شرارة القنبلة في الانفجار ومتوقع تحصل كارثه تانية لو حصل ومشي 'عماد متعب' عشان ينفذ حلمه بعقد احتراف أوربى إما في بريستول أو فولهام.

وطبعًا إحنا مش عايزين لا انفجارات ولا يحزنون في الأهلي يا ريت إن 'جوزيه' يعرف يختار عشان الأهلي يرجع البطولة من تاني..

وزي ما الأهلي فيه قنبلة ذرية وهيدوجينية الزمالك فيه كارثة أكبر وأظن إنها مش هتخلي في الفريق لاعب جنب التاني...عشان الانتخابات الكل مشغول بيها وكفاية إن البهوات في ميت عقبة لغوا المعسكر الخارجي عشان اللاعيبة تفضل في مصر عشان كل لاعب يبقى موجود ويقدر ده ولا ده يجيبهم في الندوات، والانتخابات زي الوردة في عروة الجاكيتة.... وطظ في الفريق، والكل يروح في الكازوزه المهم إن البهوات ينجحوا... وطبعًا الكلام ده مش من دماغنا ده من اللي بيحصل وحصل في الزمالك، والكل شاف وسمع الفضايح اللي حصلت بين الرئيس الخديوي 'عباس' واللاعب الدولي 'عمرو زكي' لدرجة إن السيناريو دخل فيه كمان الشتائم والطرد والبودي جاردات وأظن إن ده أبسط حاجة تدل على كلامنا إن الكوراث جاية جاية وبصراحة صعبان عليّ الزمالك طب بلاش عارفين مثلاً المشكلة بتاعت شارة الكابتنة بين 'عبد الواحد السيد' و'محمد أبو العلا' و'أيمن عبد العزيز' وطبعًا ده كلام مش من عندي وحتى كمان المؤتمر الصحفى عشان 'أجوجو' و'هولمان' و'أيمن عبد العزيز' وإزاي إنه اتغير من مكان لمكان ومش بس كده واتأخر كمان وده في مصر بلدنا عادي، ولكن ده ليه؟ عشان الانتخابات يا جماعة.. وإن الخديوي عايز يجيب 'أجوجو' بأي تمن وإلا هتكون الخيبة كبيرة في الانتخابات والدليل إن منافسيه ماسكين حتة 'زاكاروني' و'أجوجو' زي اللبانة وبيقولوا كلام كتير عشان الخديوي مش عارف يخلص حاجة بفلوسه... سلاحه الوحيد..

ولحد ما الخديوي يخلص الصفقات والخواجة 'جوزيه' ما يحط القائمة الإفريقية هنستنى لما نشوف اللي هيحصل.

وقبل ما نمشي ونشوف بعض الأسبوع اللي جاي عايزين نعرف مين رايح فين؟ الكابتن 'حسن شحاتة' إيه رأيه في الكلام الكتير حوالين إنه فاتح المنتخب عشان تظبيط ابنه 'كريم' في الزمالك في ضم اللاعبين الدوليين وآخرهم 'هاني سعيد'... وبجد بيهددهم إنهم هيكونوا بره القصة ومش هيشوفوا المنتخب لو ما نفذوش كلامه... بصراحة كلام فارغ وماأظنش المعلم يعمل كده خالص... مش كده ولا انتوا رأيكم إي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

شكرا على الموضوع الرائع

مشكوور جدا