مش عادي !!!!

.. أهو ده اللى مش عادى ..

انك تلاقى ميكروباس بيرخم عليك وانت سايق عربيتك

..ده عادى ..


لكن انه يرخم عليك ويخبطك وبكل بجاحة ينزل يتخانق معاك
لانك لو كنت وسعت له من الاول وسيبته يعدى
مكنش حصلك اللى حصل

.. أهو ده اللى مش عادى ..

انك تلاقى واحد سايق بسرعة ومالوش دعوة بالناس اللى بتعدى

..ده عادى ..

لكن انك تلاقى واحد سايق على مهله
واول ماتيجي تعدى من ادامه يروح دايس بنزين
وفاتح على الرابع ويقعد يضرب لك فى كلاكس

.. اهو ده اللى مش عادى ..

انك تلاقى الكوبرى واقف على الصبح
وتتاخر ساعة على شغلك ويتخصم لك اليوم من مرتبك

..ده عادى ..

لكن انك تكتشف بعد ده كله انك كنت متعطل
علشان كان فى مسئول كبير معدى من فوق الكوبرى

.. اهو ده اللى مش عادى ..

انك تقف ساعة مستنى تاكسى يجي فاضى
ولما يجي التاكسى يرفض يوصلك

..ده عادى ..

لكن انك تلاقى نفس التاكسى وقفلي انا ومستني اركب
ووافق انه يوصلني نفس المكان اللى غيري كان عاوزو علشان بنت

.. اهو ده اللى مش عادى ..

انك تقف تستنى الاوتوبيس ساعة ونص فى المحطة وميجيش

..ده عادى..

لكن انه يجي بعد الساعة ونص ويعدى من ادام المحطة
ويعمل فيها عبده العبيط ولا كأنه شايفك بتشاور له
ويكمل علطول وميقفش علشان تركب


.. اهو ده اللى مش عادى ..